НАТО Украина учун 70 миллиард евролик янги ҳарбий ёрдам пакетини муҳокама қилмоқда
Украинани қўллаб-қувватлаш масаласи 7–8 июль кунлари бўлиб ўтадиган НАТО саммитининг асосий мавзуларидан бири бўлиши кутилмоқда.
НАТО мамлакатлари Украина учун 70 миллиард евролик янги ҳарбий ёрдам мажбуриятини қабул қилиш имкониятини кўриб чиқмоқда. Мазкур ташаббус альянснинг келаси ой Анқарада бўлиб ўтадиган саммитида эълон қилиниши мумкин.
Politico нашрининг НАТОдаги дипломатларга таяниб хабар беришича, Германия томонидан илгари сурилган таклиф Украинага ажратилаётган маблағлар устидан назорат ва шаффофликни кучайтиришга қаратилган янги механизмни ҳам ўз ичига олади.
Ташаббус айрим давлатларнинг Киевни қўллаб-қувватлаш харажатлари тенг тақсимланмаётгани ҳақидаги эътирозлари фонида муҳокама қилинмоқда.
Таклифга кўра, 70 миллиард евронинг 30 миллиард евроси Европа Иттифоқининг аввалроқ тасдиқланган 90 миллиард евролик кредит дастуридан, қолган 40 миллиард евро эса НАТО аъзоларининг икки томонлама мажбуриятлари ҳисобидан шакллантирилади.
Россиянинг Украинага қарши кенг кўламли уруши бешинчи йилга кираётган бир пайтда НАТО иттифоқчилари Киевни қўллаб-қувватлашни давом эттириш масаласини муҳокама қилмоқда. АҚШ президенти Доналд Трамп маъмурияти даврида Украинага янги ҳарбий ёрдам деярли тўхтатилган бўлиб, Вашингтон ҳозирда Киевга асосан бошқа иттифоқчилар томонидан молиялаштирилаётган қуролларни сотмоқда.
Украина президенти Володимир Зеленский НАТО бош котиби Марк Рютте билан учрашувда Европа давлатларини Patriot ҳаво мудофаа тизимлари учун ракеталар етказиб беришни кўпайтиришга чақирди. Унинг сўзларига кўра, мавжуд захираларнинг камайиши етказиб бериш жараёнига таъсир кўрсатмоқда.
Киэл институти маълумотларига кўра, Европа давлатлари 2026 йилнинг январь–апрель ойларида Украинага ойига ўртача 2 миллиард евро ҳарбий ёрдам ажратган. Шу даврда АҚШ томонидан янги ҳарбий ёрдам қайд этилмаган.
Украинани қўллаб-қувватлаш масаласи 7–8 июль кунлари бўлиб ўтадиган НАТО саммитининг асосий мавзуларидан бири бўлиши кутилмоқда. Дипломатларга кўра, якуний қарор НАТО мудофаа вазирлари йиғилишидан сўнг қабул қилиниши мумкин.
