Самарқандда ҳомиласи нобуд бўлган аёл уч кун ўтиб вафот этди

 

Ижтимоий тармоқларда Самарқанд вилоятининг Иштихон туманида ҳомиласи нобуд бўлган аёлнинг орадан уч кун ўтиб вафот этгани ҳақида хабарлар тарқалди. Мазкур ҳолат юзасидан Соғлиқни сақлаш вазирлиги расмий маълумот берди.

 

Қайд этилишича, фуқаро Н.Э. жорий йил 10 апрел куни Иштихон туман марказий шифохонасининг туғуруқ бўлимига қорин ва бел соҳасидаги оғриқлар билан мурожаат қилган. Тиббий кўрик давомида қоғоноқ сувлари хиралашгани ҳамда ҳомиланинг юрак уришида жиддий ўзгаришлар аниқланган.

 

Шифокорлар томонидан бемор ва унинг яқинларига шошилинч равишда кесарча кесиш амалиётини ўтказиш зарурлиги тушунтирилган. Бироқ беморнинг яқинлари жарроҳлик амалиётига розилик бермаган ва аёл бошқа тиббиёт муассасасига олиб кетилган.

 

Кейинги текширувларда ҳомиланинг антенатал ўлими аниқланган. Шундан сўнг бемор 11 апрел куни Иштихон туман марказий шифохонасига қайта мурожаат қилган ва стационар даволанишга ётқизилган.

 

Шифокорлар томонидан зарур тиббий муолажалар ўтказилганига қарамай, фуқаро Н.Э. 14 апрел куни вафот этган.

 

Мазкур ҳолат юзасидан ҳуқуқни муҳофаза қилувчи органлар ҳамда вилоят соғлиқни сақлаш бошқармаси мутахассислари иштирокида хизмат текшируви ва суд-тиббий экспертиза тайинланган.

 

Суд-тиббий экспертиза хулосасига кўра, марҳуманинг ўлимига ўткир юрак-қон томир ва нафас етишмовчилиги билан кечган ўпка артерияси тромбоемболияси сабаб бўлган.

 

Шунингдек, масъул тиббиёт ходимларининг ҳаракатларига ҳуқуқий баҳо бериш мақсадида қўшимча комиссион суд-тиббий экспертиза тайинланган. Ҳозирда туман прокуратураси томонидан терговга қадар текширув ҳаракатлари давом эттирилмоқда.

 

Эслатиб ўтамиз, аввалроқ  Наманганда аёл укол олаётганда вафот этгани ҳақида хабар берилган эди.