Европа Иттифоқи эронликларга қарши санкциялар жорий қилди
Қарор Ҳормуз бўғозида денгиз қатновининг чеклангани ортидан қабул қилинган.
Европа Иттифоқи Ҳормуз бўғозида денгиз қатнови эркинлигини чеклаш билан боғлиқ ҳаракатлар сабаб Эроннинг икки фуқароси ҳамда Ислом инқилоби қўриқчилари корпуси (ИИҚК) Денгиз кучларининг Ҳормозгон вилояти қўмондонлигига нисбатан санкциялар жорий қилди. Бу ҳақда Reuters хабар берди.
ЕИ баёнотига кўра, санкциялар рўйхатига ИИҚК Денгиз кучлари қўмондонининг сиёсий масалалар бўйича ўринбосари Муҳаммад Акбарзода ва Эрон Нефть, газ ва нефть-кимё маҳсулотлари экспортчилари уюшмаси вакили Ҳамид Ҳусайний ҳам киритилган.
Брюсселнинг таъкидлашича, бу Европа Иттифоқининг навигация эркинлигини ҳимоя қилиш бўйича янги санкция механизмидан Эронга нисбатан илк бор фойдаланишидир. Қарор дунё нефтининг қарийб бешдан бир қисми ташиладиган Ҳормуз бўғозидаги денгиз қатнови эркинлигига таҳдидлар билан изоҳланган.
Европа Иттифоқининг ташқи сиёсат бўйича раҳбари Кая Калласнинг айтишича, Эроннинг бўғоздаги ҳаракатлари қабул қилиб бўлмайдиган ҳолат ҳисобланади. Унинг сўзларига кўра, аъзо давлатлар транзит ҳаракатини бузишда иштирок этган Эрон ташкилотлари ва шахсларига нисбатан санкцияларни маъқуллаган.
“Бу Европа Иттифоқининг навигация эркинлиги режимидан биринчи марта фойдаланишидир ва зарурат туғилганда ундан яна фойдаланамиз”, — деди Каллас Кипрда ўтказилган матбуот анжуманида.
Эрон ташқи ишлар вазири ўринбосари Козим Ғарибободи эса Теҳрон Европа Иттифоқининг ушбу қарорини “сиёсий ва иккиюзламачи қадам” деб баҳолаганини билдириб, Эрон стратегик аҳамиятга эга бўлган Ҳормуз бўғози устидан ўз суверенитетини сақлаш сиёсатини давом эттиришини маълум қилди.
Эрон 2026 йил 28 февраль куни АҚШ ва Исроилнинг мамлакатга қарши зарбалари бошланганидан сўнг Ҳормуз бўғозини ёпиш чораларини кўрган эди.
