Нетаняху яна бош вазирлик учун номзодини қўяди
Доналд Трамп Нетаняхунинг яна сайловларда қатнашишига шубҳа билдирган эди.
Исроил бош вазири Бенжамин Нетаняху жорий йилда бўлиб ўтадиган парламент сайловларида қайта номзодини қўяди. Бу ҳақда унинг Ликуд партиясига таяниб, Reuters хабар берди.
Партия баёнотида Нетаняхунинг сайловларда иштирок этиши ва ғалаба қозонишига умид билдирилган. Сайлов санаси ҳали расман эълон қилинмаган бўлса-да, қонунчиликка кўра, овоз бериш октябрь ойигача ўтказилиши керак.
Ликуднинг баёноти АҚШ президенти Доналд Трампнинг Нетаняхунинг яна сайловларда қатнашиш-қатнашмаслигига ишончи комил эмаслигини билдирганидан сўнг эълон қилинди.
Бўлажак сайловлар 2023 йил 7-октабрда ҲАМАС томонидан уюштирилган ҳужумдан кейинги илк парламент сайловлари бўлади. Ушбу ҳужум Исроил тарихидаги энг йирик хавфсизлик инқирозларидан бири сифатида баҳоланади ва Ғазо секторидаги урушга сабаб бўлган.
2022 йил декабрида ҳокимиятга қайтган Нетаняху фаолияти давомида ҳукуматга қарши оммавий норозилик намойишлари ҳамда Ғазо, Ливан ва Эрон билан боғлиқ можаролар фонида фаолият юритди.
Сўнгги ижтимоий сўровлар Нетаняхунинг ҳукмрон коалицияси кейинги сайловларда парламентда кўпчилик ўринни қўлга кирита олмаслигини кўрсатмоқда.
Исроил Демократия Институти томонидан 9 июнь куни эълон қилинган сўров натижаларига кўра, респондентларнинг 61 фоизи Нетаняху қайта сайловларда қатнашмаслиги керак деб ҳисоблайди.
Шу билан бирга, сўровлар мухолифат партиялари ҳам араб партиялари билан иттифоқ тузмасдан туриб парламентда кўпчиликни шакллантира олмаслигини кўрсатмоқда.
АҚШ ва Исроил расмийларига кўра, Трамп ва Нетаняху ўртасидаги яқин муносабатлар сақланиб қолаётган бўлса-да, айрим масалаларда келишмовчиликлар ҳам кузатилган. Жумладан, Трамп сўнгги ҳафталарда Исроилни Ливандаги ҳарбий ҳаракатларни чеклашга чақирган эди.
Шунингдек, у Нетаняхуга нисбатан илгари сурилган коррупция айбловлари бўйича Исроил президентини уни афв этишга бир неча бор даъват қилган.
