Қозоғистонда мансабдор шахс сохта “тозалаш” сурати сабаб ишдан бўшатилди
Амалдор сунъий интеллект ёрдамида таҳрирланган суратларни ҳақиқий ободонлаштириш ишлари натижаси сифатида тақдим этган.
Қозоғистоннинг Олмаота шаҳрида сунъий интеллект ёрдамида таҳрирланган суратларни ҳақиқий ободонлаштириш ишлари натижаси сифатида тақдим этган мансабдор шахс ишдан бўшатилди. Бу ҳақда NUR.KZ нашри хабар берди.
Маълум қилинишича, май ойида ижтимоий тармоқ фойдаланувчиларидан бири Бостандиқ туманидаги ҳудудда узоқ вақт давомида йиғилиб қолган чиқиндилар акс этган суратларни эълон қилган. Шундан сўнг туман ҳокимлиги мурожаатга жавобан ҳудуд тозалангани ҳақида фотосуратларни тақдим этган.
Бироқ ижтимоий тармоқ фойдаланувчилари ушбу суратлар сунъий интеллект ёрдамида таҳрирланганини пайқаган. Платформа ҳам расмларни “AI-generated” (сунъий интеллект ёрдамида яратилган) деб белгилаган.
Шундан сўнг Бостандиқ тумани ҳокимлиги томонидан ҳолат юзасидан текширув ўтказилган. Ҳокимлик матбуот хизматига кўра, масъул давлат хизматчиси суратларни тайёрлашда сунъий интеллектдан фойдаланганини тан олган.
Натижада мазкур ходим билан тузилган меҳнат шартномаси бекор қилиниб, унинг давлат органидаги фаолиятига якун ясалган. Ҳокимлик вакиллари ходим айбини тан олгани сабабли қўшимча хизмат текширувини ўтказишга эҳтиёж қолмаганини маълум қилган.
Маҳаллий ҳокимият ушбу масала ёпилганини ва қўшимча расмий тартиб-таомиллар талаб этилмаслигини билдирган.
