Андижондаги фожиада ҳалок бўлганлар поликлиниканинг техник ходимлари экани маълум қилинди
Ходимлар оқова ва чиқинди сувлар тўпланадиган бункерда тозалаш ҳамда таъмирлаш ишларини олиб бориш вақтида заҳарли газ таъсирига учраган.
Ижтимоий тармоқларда Андижон вилоятининг Марҳамат туманидаги тиббиёт бирлашмасида 4 нафар поликлиника ходими ҳалок бўлгани ҳақида хабарлар тарқалди. Маълум қилинишича, ҳодиса оқибатида вафот этганлар тиббиёт ходимлари эмас, балки муассасанинг техник ходимлари бўлган.
Вилоят ҳокимлиги матбуот хизмати маълумотларига кўра, 10 июн куни Марҳамат туман тиббиёт бирлашмасига қарашли муассаса ҳудудида техник ходимлар оқова ва чиқинди сувлар тўпланадиган бункерда тозалаш ҳамда таъмирлаш ишларини олиб бориш вақтида заҳарли газ таъсирига учраган. Оқибатда 4 нафар ходим воқеа жойида вафот этган.
Ҳодиса ҳақида тегишли хизматларга хабар берилгач, қутқарувчилар воқеа жойига етиб келиб, марҳумларнинг жасадларини бункер ичидан олиб чиққан.
Вилоят ҳокимлиги маълумотига кўра, марҳумларнинг оила аъзоларига ҳамдардлик билдирилган ва дафн маросимларини ташкил этиш билан боғлиқ зарур чоралар кўрилган.
Бош прокуратура матбуот хизматининг маълум қилишича, мазкур ҳолат юзасидан жиноят иши қўзғатилган.
