Қозоғистон Россия газини Ўзбекистонга етказиб бериш ҳажмини оширишга тайёрлигини маълум қилди
Газнинг етказиб бериш ҳажмини йилига 11 миллиард кубометргача ошириш имконияти ҳам муҳокама қилинмоқда.
Қозоғистон Ўзбекистонга Россия газини етказиб бериш ҳажмини ошириш имконияти мавжудлигини маълум қилди. Бу ҳақда Қозоғистон энергетика вазири Ерлан Аккенженов журналистлар билан мулоқот чоғида билдириб ўтди деб хабар беради ТАСС.
Унинг таъкидлашича, транзит ҳажмларини кўпайтириш масаласи, аввало, транспорт инфратузилмаси имкониятларига боғлиқ. Вазирнинг қайд этишича, Қозоғистон томони бу борада зарур техник имкониятларига эга ҳамда қўшимча газ транзитини таъминлашга тайёр.
“Қозоғистон томонида бунга ҳамма нарса тайёр. Ҳозир Россия ва Ўзбекистон ўртасида ушбу масала бўйича музокаралар олиб борилмоқда. Биз транзит давлат сифатида газ ташишни таъминлашга тайёрмиз”, — деган Аккенженов.
Вазирнинг сўзларига кўра, истиқболда Россия газининг Ўзбекистонга етказиб бериш ҳажмини йилига 11 миллиард кубометргача ошириш имконияти ҳам муҳокама қилинмоқда.
Аввалроқ Россия Бош вазири ўринбосари Александр Новак ҳам Россия, Қозоғистон ва Ўзбекистон ўртасида газ инфратузилмасини кенгайтириш ҳамда қўшимча газ етказиб бериш бўйича музокаралар давом этаётганини маълум қилган эди.
