Россияда мигрантлар учун мажбурий тиббий кўрик 90 кундан 30 кунгача қисқартирилди

 

Россия Президенти Владимир Путин ноқонуний миграцияга қарши курашиш ҳамда меҳнат мигрантларининг соғлиғи устидан назоратни кучайтиришга қаратилган янги қонунни имзолади.

 

Янги тартибга кўра, Россияга кириб келган хорижий фуқаролар ва меҳнат мигрантлари хавфли юқумли касалликлар, ОИВ инфекцияси ҳамда гиёҳванд моддаларни истеъмол қилиш ҳолатлари бўйича тиббий кўрикдан 30 кун ичида ўтиши шарт бўлади. Аввал ушбу муддат 90 кун этиб белгиланган эди.

 

Шунингдек, Россия ҳудудида 30 кундан ортиқ муддат қоладиган мигрантлар ҳар йили мажбурий тиббий текширувдан ўтказилиши назарда тутилган.

 

Қонунга мувофиқ, тиббий кўрик харажатлари мигрантларнинг ўзлари ёки уларни ишга қабул қилаётган иш берувчилар томонидан қопланади. Бундан ташқари, мигрантларни тиббий текширувдан ўтказишда воситачилар иштирокига чек қўйилиб, ушбу хизматларни фақат ваколатли ташкилотлар амалга ошириши мумкин бўлади.

 

Янги тартиб вақтинчалик яшаш гувоҳномаси, ишлаш учун рухсатнома олиш ёки уни узайтириш жараёнларида ҳам тиббий кўрикдан ўтишни мажбурий талаб сифатида белгилайди.

 

Тиббий текширув натижалари электрон шаклда расмийлаштирилиб, Ягона давлат соғлиқни сақлаш ахборот тизимига киритилади. Агар мигрантда хавфли касалликлар, ОИВ инфекцияси ёки гиёҳванд моддалар истеъмоли аниқланса, тегишли тиббиёт муассасалари бу ҳақда 24 соат ичида Ички ишлар вазирлиги ва санитария назорати органларига маълумот тақдим этади.

 

Маълум қилинишича, мазкур қонун 2026 йил 1 сентябрдан кучга киради.