Журналист жонли эфирни ташлаб, Шакира томон югурди
У колумбиялик хонанда билан суратга тушмоқчи бўлган.
2026-йилги футбол бўйича Жаҳон чемпионати очилиш ўйини арафасида аргентиналик журналист Марсело Бенедетто жонли эфир вақтида колумбиялик хонанда Шакира билан суратга тушиш учун репортажни вақтинча тўхтатиб қўйди.
Ҳодиса Мексикадаги Ацтека стадионида юз берган. Журналист очилиш маросимига тайёргарлик жараёнлари ҳақида эфир олиб бораётган пайтда Шакиранинг майдонга чиқаётганини пайқаб қолган. Шундан сўнг у ҳамкасбларига “Унинг ортидан бораман” дея микрофонни қолдириб, хонанда томон йўл олган.
Маҳаллий ОАВ маълумотларига кўра, Бенедетто Шакирага яқинлашиб, ундан селфи тушишни сўраган. Хонанда журналистнинг илтимосини рад этмаган ва улар биргаликда суратга тушган.
Кейинчалик мухбир эфирга қайтиб, ўзининг бу ҳаракатини ҳазил аралаш изоҳлаган. Воқеа акс этган видео ижтимоий тармоқларда тез тарқалиб, фойдаланувчилар орасида кенг муҳокама қилинди.
Ижтимоий тармоқ фойдаланувчилари журналистнинг бундан аввал ҳам йирик халқаро тадбирлар чоғида машҳурлар билан суратга тушишга муваффақ бўлганини эслатиб ўтган.
