Эрон ва АҚШ ўртасидаги 14 бандли меморандум лойиҳаси эълон қилинди

 

Эроннинг Меҳр ахборот агентлиги Эрон ва АҚШ ўртасида муҳокама қилинаётган ўзаро англашув меморандуми лойиҳасини эълон қилди. 14 банддан иборат ҳужжатда минтақадаги ҳарбий ҳаракатларни тўхтатиш, санкцияларни бекор қилиш, Эроннинг музлатилган активларини озод этиш ҳамда ядровий масалалар бўйича келишувга эришиш каби қатор масалалар акс этган.

 

Лойиҳага кўра, барча жабҳаларда урушни тўлиқ ва зудлик билан тўхтатиш, АҚШнинг Эрон суверенитетини ҳурмат қилиши ва мамлакат ички ишларига аралашмаслик мажбурияти белгиланган.

 

Ҳужжатда, шунингдек, 30 кун ичида денгиз блокадасини бекор қилиш, Ҳормуз бўғози фаолиятини тиклаш ва АҚШ қўшинларини Эрон билан чегарадош ҳудудлардан олиб чиқиш таклиф этилган.

 

Меморандум лойиҳасида Эрон нефти ва нефт-кимё маҳсулотларига қўйилган санкцияларни тўхтатиб туриш, мамлакатнинг молиявий ресурсларидан фойдаланишига имкон яратиш ҳамда Эронни тиклаш бўйича камида 300 миллиард долларлик дастур ишлаб чиқиш масалалари ҳам ўрин олган.

 

Томонлар 60 кун ичида ядровий масалалар бўйича якуний келишувга эришиш юзасидан музокаралар ўтказиши, Эрон эса Ядровий қуролни тарқатмаслик тўғрисидаги шартномага содиқлигини яна бир бор тасдиқлаши ва ядровий қурол ишлаб чиқармаслик мажбуриятини олиши назарда тутилган.

 

Бундан ташқари, музокаралар даврида АҚШ томонидан янги санкциялар жорий этмаслик ва минтақадаги қўшинлар сонини оширмаслик таклиф қилинган.

 

Эрон Ташқи ишлар вазирлиги мазкур матн дастлабки лойиҳа эканини, у ҳали мамлакатнинг тегишли идоралари томонидан кўриб чиқилиши ва қайта ишланиши лозимлигини маълум қилди. АҚШ томони эса ҳозирча бундай меморандум лойиҳаси муҳокама қилинаётгани юзасидан расмий изоҳ бермаган.