Тошкентда 34 кг наркотик моддалар билан ҳаракатланган “Lasetti” тўхтатилди
Хориждан контрабанда йўли билан олиб кирилган наркотиклар орасида қарийб 13 кг опий ва 21,6 кг гашиш бўлган.
Тошкент шаҳрида ўтказилган тезкор тадбир давомида 34 килограммдан ортиқ гиёҳвандлик воситаларининг ноқонуний айланмасига чек қўйилди.
Давлат хавфсизлик хизмати ҳамда Ички ишлар органлари ходимлари ҳамкорлигида ўтказилган тадбирда пойтахтдаги “Қўйлиқ” бозори яқинида шубҳали тарзда тўхтаб турган “Lasetti” русумли автомашина холислар иштирокида кўздан кечирилган. Бу ҳақда ДХХ Zamon.uz'гa хабар берди.
Аниқланишича, транспорт воситасини Сурхондарё вилоятининг Сариосиё туманида яшовчи, 1968 йилда туғилган ва муқаддам судланган шахс бошқарган. Автомобилда, шунингдек, 1984 йилда Денов шаҳрида туғилган ва ҳозирда Тошкент шаҳрида истиқомат қилувчи фуқаро ҳам бўлган.
Текширув давомида автомашина салонидаги елим идиш ичидан 30 та ўрамга жойлаштирилган жами 34 килограмм 610 грамм оғир турдаги гиёҳвандлик воситалари аниқланиб, ашёвий далил сифатида расмийлаштириб олинган. Мусодара қилинган моддалар орасида 12 килограмм 960 грамм опий ва 21 килограмм 650 грамм гашиш бўлгани маълум қилинган.
Дастлабки маълумотларга кўра, мазкур турдаги гиёҳвандлик воситалари мамлакат ҳудудига хориждан контрабанда йўли билан олиб кирилган.
Ҳолат юзасидан ДХХ Тергов бошқармаси томонидан Жиноят кодексининг тегишли моддалари билан жиноят иши қўзғатилиб, гумонланувчиларга нисбатан қамоқ эҳтиёт чораси қўлланилган.
Ҳозирда тергов доирасида ушбу жиноятга алоқадор бошқа шахсларни аниқлаш бўйича тезкор-суриштирув тадбирлари давом эттирилмоқда.
