Ўзбекистонда “военкомат”лар тугатилаётгани йўқ — Мудофаа вазирлиги
Вазирлик мамлакатда мудофаа ишлари органлари фаолияти тугатилмаётганини, аксинча, тизим замонавий талаблар асосида такомиллаштирилаётганини билдирди.
Ижтимоий тармоқларда Ўзбекистонда мудофаа ишлари бўлимлари (“военкомат”лар) босқичма-босқич тугатилиши ҳақидаги хабарлар тарқалди. Мудофаа вазирлиги ушбу маълумотлар нотўғри талқин қилинганини билдириб, расмий муносабат билан чиқди.
8 июнь куни президентга мудофаа соҳасидаги айрим масалалар юзасидан тақдимот ўтказилган. Унда мудофаа ишлари органлари фаолиятини рақамлаштириш, уларни электрон ҳукумат тизими билан интеграция қилиш, маълумотлар алмашинувини тезлаштириш ҳамда фуқароларга кўрсатилаётган хизматлар сифатини оширишга қаратилган таклифлар кўриб чиқилган.
Тақдимотда ҳарбий ҳисобга олиш, тиббий ва чақирув комиссиялари фаолиятини рақамлаштириш бўйича ташаббуслар ҳам муҳокама қилинган. Хусусан, 16 ёшга тўлиб, ИД-карта олган ўғил болалар ҳақидаги маълумотларни Ички ишлар вазирлигининг ахборот тизимидан олиш ва уларни автоматик тарзда ҳарбий ҳисобга қўйиш тартибини жорий этиш режалаштирилмоқда.
Шунингдек, мудофаа ишлари бўлимларида тиббий комиссиядан ўтиш амалиётини бекор қилиш, тиббий кўрикларни эса туман ва шаҳар марказий кўп тармоқли поликлиникаларида ташкил этиш таклиф этилган.
Мудофаа вазирлиги мамлакатда мудофаа ишлари органлари фаолияти тугатилмаётганини, аксинча, тизим замонавий талаблар асосида такомиллаштирилаётганини таъкидлади. Вазирликка кўра, рақамли хизматларни жорий этишдан мақсад бюрократик жараёнлар ва фуқароларнинг ортиқча оворагарчилигини камайтиришдан иборат.
