22 минг доллар эвазига АҚШга юборишни ваъда қилган шахс ушланди
Шунингдек, Жанубий Кореяга ишчи виза олиб беришни ваъда қилиб, 6 минг доллар талаб қилган аёл қўлга олинди.
Ноқонуний миграцияга қарши курашиш йўналишида Давлат хавфсизлик хизмати, Иқтисодий жиноятларга қарши курашиш департаменти ҳамда ички ишлар органлари ҳамкорлигида ўтказилган тезкор тадбирлар давомида хорижга ишга юбориш билан боғлиқ фирибгарлик ҳолатлари фош этилди. Бу ҳақда ДХХ Zamon.uz'га хабар берди.
Аниқланишича, Тошкент вилоятининг Чиноз туманида яшовчи, 1969 йилда туғилган ва муқаддам бир неча маротаба судланган шахс пойтахтда истиқомат қилувчи фуқаронинг ишончига кириб, уни мансабдор танишлари орқали АҚШга ишчи виза асосида юборишни ваъда қилган. Бунинг эвазига 22 минг АҚШ доллари талаб қилган шахс олдиндан 5 минг АҚШ долларини олган вақтида ашёвий далиллар билан қўлга олинган.
Шунингдек, Андижон вилоятининг Избоскан туманида яшовчи 1993 йилда туғилган фуқаро Асака туманида истиқомат қилувчи йигитга Жанубий Кореяга ишчи виза расмийлаштириб бериш ва ишга юборишни ваъда қилиб, 6 минг АҚШ доллари талаб қилган. У олдиндан 3 минг АҚШ долларини олган вақтида тезкор тадбир давомида ушланган.
Терговга қадар текширув жараёнида мазкур шахс аввал ҳам бошқа бир фуқарони Жанубий Кореяга ишга юборишни ваъда қилиб, ундан пул олгани аниқланган.
Ҳозирда ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
