Эрон уран захираларига кириш йўлларини портлатиб, миналар ўрнатмоқда

Эрон АҚШ томонидан бойитилган уран захираларини қўлга киритиш эҳтимолидан хавотирланиб, ядровий материаллар сақланаётган объектларда хавфсизлик чораларини кучайтирди. Бу ҳақда АҚШ разведкасига яқин манбаларга таяниб, CNN хабар берди.

 

Маълумотларга кўра, Теҳрон қурол даражасига яқин бойитилган уран сақланаётган айрим туннелларни атайлаб қулатган ва кириш йўлларига портловчи миналар ўрнатган. Натижада тахминан ярим тонна юқори даражада бойитилган уранга етиб бориш анча мураккаб ва хавфли вазифага айланган.

 

CNN манбаларининг таъкидлашича, бу чоралар АҚШ президенти Доналд Трампнинг уран захираларини назоратга олиш ёки қўлга киритиш имкониятини очиқ муҳокама қилганидан сўнг кўрилган бўлиши мумкин.

 

Бироқ экспертлар бу қарор Эроннинг ўзи учун ҳам муаммолар туғдириши мумкинлигини айтмоқда. АҚШ Миллий ядро хавфсизлиги маъмуриятининг собиқ расмийси Скотт Роккернинг фикрича, туннелларни қулатиш ва ҳудудларни миналаштириш бойитилган уранни кейинчалик текшириш, олиб чиқиш ёки қайта ишлаш жараёнини сезиларли даражада мураккаблаштиради.

 

Унинг айтишича, агар Теҳрон халқаро келишув доирасида уран захираларини назорат учун тақдим этишга рози бўлса, ушбу материалларга кириш ва уларнинг тўлиқ ҳисобини таъминлаш масъулияти Эрон зиммасига тушади. Шу билан бирга, Теҳрон ураннинг айрим қисмларини қазиб олишнинг имкони бўлмаганини даъво қилиши ҳам мумкин.

 

Экспертлар назарида, бундай ҳолат халқаро ҳамжамиятда Эрон келажакда ушбу материалларга қайта кириш имкониятини сақлаб қолмаганига оид шубҳаларни кучайтириши мумкин.

 

CNN маълумотига кўра, бойитилган уран захираларининг катта қисми Исфаҳон ядро мажмуасидаги ерости иншоотларида сақланмоқда. АҚШ ва Эрон ўртасида эҳтимолий ядровий келишув муҳокама қилинаётган бўлса-да, уранни назорат қилиш ва олиб чиқиш билан боғлиқ техник масалалар бўйича қўшимча музокаралар талаб этилиши кутилмоқда.