Келажакда Жаҳон чемпионатида 64 та терма жамоа иштирок этиши мумкин

 

FIFА президенти Жанни Инфантино келажакда Жаҳон чемпионати иштирокчилари сонини 64 та жамоагача ошириш имконияти муҳокама қилинаётганини маълум қилди.

 

Унинг сўзларига кўра, FIFА аввало 2026-йилги мундиалнинг 48 жамоали форматдаги натижаларини таҳлил қилади. Шундан сўнг турнирни янада кенгайтириш масаласи юзасидан қарор қабул қилиниши мумкин.

 

Инфантино Бразилиянинг CazeTV каналига берган интервюсида FIFА дунё футболига янада кўпроқ мамлакатларни жалб этиш мақсадида турли вариантларни кўриб чиқаётганини таъкидлаган.

 

FIFА раҳбари суҳбат давомида кетма-кет учинчи марта Жаҳон чемпионатига чиқа олмаган Италия терма жамоаси ҳақида ҳам ҳазиломуз фикр билдирган. У 64 жамоали форматда италияликларнинг мундиалга йўлланма олиш имконияти ошишини айтиб, киноя тариқасида турнирни ҳатто 208 жамоагача кенгайтириш мумкинлигини ҳам қўшимча қилган.

 

Маълумот учун, Италия терма жамоаси Европа саралаш босқичининг плей-оффида мағлуб бўлиб, 2026 йилги Жаҳон чемпионатига йўлланма ололмаган. Шу тариқа, тўрт карра жаҳон чемпионлари кетма-кет учинчи мундиални ўтказиб юбормоқда.

 

Эслатиб ўтамиз, 2026 йилги FIFА Жаҳон чемпионати илк бор 48 та жамоа иштирокида ўтказилмоқда. Мусобақага АҚШ, Канада ва Мексика мезбонлик қилмоқда. Турнир 11 июнда старт олган бўлиб, 19 июлга қадар давом этади.