Қозоғистонда Ўзбекистон билан чегарадаги божхона постларида тирбандликлар юзага келиши мумкин
13 июн соат 21:00 дан 14 июн соат 08:00 гача Қозоғистон ахборот тизимларида узилишлар кузатилади.
Қозоғистон Республикаси Молия вазирлиги ҳузуридаги Давлат даромадлари қўмитаси маълумотига кўра, 2026 йил 13 июн соат 21:00 дан 14 июн соат 08:00 га қадар режали техник ишлар амалга оширилади.
Мазкур даврда айрим ахборот тизимлари фаолиятида вақти-вақти билан узилишлар кузатилиши мумкин.
Божхона қўмитаси раисининг матбуот котиби Ҳусан Тангриевнинг маълум қилишича, ушбу ҳолат Ўзбекистон ва Қозоғистон чегарасида жойлашган божхона постларида транспорт воситалари ҳаракатининг секинлашишига ҳамда тирбандликлар юзага келишига сабаб бўлиши мумкин.
Шу муносабат билан экспорт, импорт ва транзит юк ташувларини амалга ошираётган ташқи иқтисодий фаолият иштирокчиларидан юк ташиш жараёнларини мазкур ҳолатни инобатга олган ҳолда олдиндан режалаштириш сўралмоқда.
