Таиландда малика Пҳатчара Киттияпҳанинг вафоти муносабати билан 15 кунлик мотам эълон қилинди
Малика 2022 йил декабр ойида спорт машғулотлари вақтида ҳушидан кетганидан сўнг оғир аҳволда шифохонага ётқизилган эди
Таиланд ҳукумати қирол Маҳа Важиралонгкорннинг тўнғич қизи малика Пҳатчара Киттияпҳанинг вафоти муносабати билан мамлакат бўйлаб 15 кунлик мотам эълон қилди. Бу ҳақда мамлакат вазирлар маҳкамаси матбуот хизматига таяниб ТАСС хабар берди.
Мамлакат Вазирлар Маҳкамаси маълумотига кўра, 12 июндан бошлаб барча давлат идоралари, таълим муассасалари ва бошқа расмий ташкилотларда давлат байроқлари ярим туширилади. Давлат хизматчилари ҳам мотам тартибига риоя қилади.
Қироллик саройи маликанинг 11 июн куни 47 ёшида вафот этганини маълум қилган. У 2022 йил декабр ойида спорт машғулотлари вақтида ҳушидан кетганидан сўнг оғир аҳволда шифохонага ётқизилган эди.
Шифокорлар томонидан олиб борилган узоқ муддатли даволаш жараёнларига қарамай, жорий йил май ойида маликанинг соғлиғи кескин ёмонлашгани, организмга тарқалган инфекция ҳаётий муҳим аъзоларга салбий таъсир кўрсатгани ҳақида хабар берилган.
Пҳатчара Киттияпҳа Таиланд қироллик оиласининг фаол вакилларидан бири бўлиб, ҳуқуқ, дипломатия ва ижтимоий лойиҳалар йўналишидаги фаолияти билан танилган эди.
