Тинчлик ҳеч қачон ҳозиргидек яқин бўлмаган — Шаҳбоз Шариф
Покистон Бош вазири АҚШ ва Эрон ўртасидаги келишув матни бўйича келишувга эришилганини маълум қилди.
Покистон Бош вазири Шаҳбоз Шариф АҚШ ва Эрон ўртасидаги тинчлик келишуви лойиҳасининг якуний матни бўйича келишувга эришилганини маълум қилди. Унинг таъкидлашича, музокараларда Покистон ва Қатар воситачи давлатлар сифатида иштирок этмоқда.
Бош вазир ижтимоий тармоқдаги саҳифасида “Тинчлик ҳеч қачон ҳозиргидек яқин бўлмаган” дея баёнот берган. Эрон ташқи ишлар вазири Аббос Ароқчи ҳам ўз навбатида томонлар ўртасидаги ўзаро англашув меморандуми якунланишига мисли кўрилмаган даражада яқин қолинганини қайд этган.
Келишувга оид хабарлар халқаро нефт бозорларида ҳам сезиларли таъсир кўрсатган. АҚШ президенти Доналд Трамп барча томонлар якуний шартларни маъқуллаганини билдирганидан сўнг Брент маркали нефт нархи кескин пасайиб, уруш бошланганидан буён энг паст кўрсаткичлардан бирини қайд этган. Кейинчалик айрим баёнотлар ортидан нархлар қисман тикланган бўлса-да, бозор юқори ўзгарувчанликни сақлаб қолмоқда.
Дастлабки маълумотларга кўра, меморандум лойиҳасида сулҳ муддатини яна 60 кунга узайтириш, Ҳормуз бўғози орқали қатновни босқичма-босқич тиклаш ҳамда Эрон ядровий дастури бўйича музокараларнинг кейинги босқичларини белгилаш назарда тутилган.
Айни пайтда меморандумнинг расмий матни эълон қилинмаган. АҚШ ва Эрон томонлари ҳужжат юзасидан якуний тасдиқ жараёнлари давом этаётганини билдирган.
