Тошкентда халқаро инвестиция форуми сабаб айрим кўчаларда ҳаракат вақтинча чекланади
Шунингдек, 16–18 июн кунлари юк автомобилларининг Тошкент шаҳрига кириши ҳам вақтинча тақиқланади.
16 июн куни Тошкент шаҳри V Тошкент халқаро инвестиция форумига мезбонлик қилади. Шу муносабат билан хавфсизлик чораларини таъминлаш мақсадида 16–18 июн кунлари шаҳарнинг айрим кўчаларида транспорт воситалари ҳаракати вақтинча чекланади.
ИИВ матбуот хизматининг маълум қилишича, чекловлар доирасида Ислом Каримов кўчасининг Шароф Рашидов ва Фурқат кўчалари оралиғидаги қисми, шунингдек Махтумқули, Темур Малик ва Янги Ўзбекистон кўчалари туташган кўприкдан Янги Ўзбекистон ҳамда Истиқлол кўчалари чорраҳасигача бўлган ҳудудларда транспорт ҳаракати вақти-вақти билан тўхтатилади.
Шунингдек, Ислом сивилизацияси маркази атрофидаги айрим йўлларда ҳам ҳаракат чекловлари жорий этилади. Жумладан, Шароф Рашидов ва Абдулла Қодирий кўчалари чорраҳасидан бошлаб Қорасарой ҳамда Нурафшон кўчалари кесишмасигача бўлган йўналишларда транспорт воситалари ҳаракати чекланади.
Ташкилотчилар томонидан йўл ҳаракати иштирокчилари учун айланма йўналишлар ташкил этилиши, тезкор хизматлар транспорти эса ушбу чекловлардан мустасно бўлиши қайд этилди.
Шунингдек, форум кунларида юк автомобилларининг Тошкент шаҳрига кириши ҳам вақтинча чекланади. Улар ҳаракати Тошкент вилояти айланма йўллари орқали йўналтирилади.
