Афғонистонда аёлларга қўйилган янги чекловларга қарши норозиликлар куч билан бостирилди

 

Афғонистоннинг Ҳирот вилоятида аёллар учун жорий этилган янги чекловлар ортидан бошланган норозилик намойишлари хавфсизлик кучлари томонидан куч ишлатиш йўли билан бостирилди. Бу ҳақда ТОLOnews хабар берди.

 

Маълумотларга кўра, июн ойи бошида Толибоннинг Фазилатни ёйиш ва иллатларнинг олдини олиш вазирлиги аёлларнинг кийинишига оид янги талабларни эълон қилган. Унга кўра, аёллар юзни тўлиқ ёпувчи ниқоб ва пайпоқ кийиши шарт этиб белгиланган, косметик воситалардан фойдаланиш эса тақиқланган.

 

Маҳаллий ОАВ ва ҳуқуқ ҳимоячиларининг билдиришича, 6–8 июн кунлари Ҳиротда камида 30 нафар аёл ва қиз мазкур қоидаларни бузганликда айбланиб қўлга олинган. Ҳибсга олинганлар орасида Чегара билмас шифокорлар (Médecins Sans Frontières) халқаро гуманитар ташкилоти ходимаси ҳам бўлган. У икки кундан сўнг ўзи ва яқинлари белгиланган қоидаларга риоя қилиш мажбуриятини олганидан кейин озод этилгани маълум қилинган.

 

Ҳирот вилояти губернатори Нур Аҳмад Исломжар аёлларнинг қўлга олинганини тасдиқлаб, уларда “психологик ва диний муаммолар” мавжудлигини даъво қилган.

 

Ҳибслар ортидан 9 июн куни Ҳиротнинг айрим ҳудудларида ўнлаб фуқаролар, жумладан аёллар ва эркаклар намойишга чиқди.

 

UNАМА маълумотига кўра, хавфсизлик кучлари намойишчиларни тарқатиш вақтида ўқотар қуроллардан фойдаланган. Оқибатда камида икки киши, жумладан бир нафар бола ҳалок бўлган, 20 дан ортиқ фуқаро жароҳат олган. Афғонистон полисияси эса намойишни тарқатишда қурол қўлланганини рад этган.

 

Норозиликлар бостирилганидан сўнг мамлакатнинг айрим ҳудудларида хавфсизлик чоралари кучайтирилган. Хусусан, Ҳирот ва Кобулнинг ғарбий туманларига қўшимча ҳарбий кучлар ҳамда зирҳли техникалар жойлаштирилгани хабар қилинмоқда. Маҳаллий аҳоли кўчаларда юзлаб қуролланган ҳарбийлар, назорат пунктлари ва кучайтирилган патруллаш тизими жорий этилганини маълум қилган.

 

Шунингдек, қўшни вилоятлар ва ҳудудларга ҳам аёллар кийинишига оид янги талаблар устидан назорат кучайтирилиши мумкинлиги ҳақида огоҳлантиришлар юборилган. Уларда қоидаларга амал қилмаган аёллар ҳибсга олиниши мумкинлиги қайд этилган.

 

БМТнинг Аёллар тузилмаси вазият юзасидан хавотир билдириб, аёлларнинг ўзбошимчалик билан ҳибсга олиниши уларнинг обрўси, хавфсизлиги ва ижтимоий ҳаётига узоқ муддатли салбий таъсир кўрсатиши мумкинлигини таъкидлади.

 

Эслатиб ўтамиз, аввалроқ Афғонистонда 9 ёшли қизларга турмушга чиқишига рухсат берилганлиги тўғрисида хабар берилган эди.