Tolibon yuzini yopmagan va tor kiyingan ayollarni qamoqqa olish bilan ogohlantirdi
Hujjatda namoz ro‘molisiz, yuzi ochiq holda, tor kiyimlarda yoki pardoz qilib ko‘chaga chiqqan ayollar Tolibonning axloq nazoratchilari tomonidan qo‘lga olinishi qayd etilgan.
Afg‘onistonning Hirot viloyatida Tolibon ayollarning kiyinish qoidalariga rioya etilishi ustidan nazoratni kuchaytirmoqda. Mahalliy manbalar va Amu TV qo‘lga kiritgan hujjatga ko‘ra, belgilangan talablarga amal qilmagan ayollar hibsga olinishi mumkin.
Xabarga ko‘ra, Tolibonning Ezgulikka buyurish va yomonlikdan qaytarish boshqarmasi erkak oila a’zolarini ayollarning jamoat joylarida “to‘g‘ri hijob” qoidalariga rioya etishini ta’minlashga chaqirgan.
Hujjatda namoz ro‘molisiz, yuzi ochiq holda, tor kiyimlarda yoki pardoz qilib ko‘chaga chiqqan ayollar Tolibonning axloq nazoratchilari tomonidan qo‘lga olinishi va ayollar saqlash muassasalariga yuborilishi mumkinligi qayd etilgan.
Shuningdek, ayollarning kiyinish qoidalariga rioya etishiga oila erkaklari javobgar hisoblanadi. Hujjatda qoidabuzarliklar sud organlariga yuborilish va boshqa huquqiy choralar ko‘rilishiga sabab bo‘lishi mumkinligi ta’kidlangan.
Mahalliy manbalarga ko‘ra, ushbu ko‘rsatma Tolibon vakillari ishtirokidagi yig‘ilishdan so‘ng qabul qilingan. Tarqalgan audioyozuvda yangi tartiblar 6-iyun kunidan kuchga kirishi aytilgan. Mahalla vakillari va masjid imomlariga aholini yangi talablar haqida ogohlantirish topshirilgan.
So‘nggi oylarda Hirotning Shahr-e Nav, 29 Hut aylanmasi, Bakrobod va Laylami yo‘li kabi hududlarida nazorat punktlari tashkil etilib, avtomobillar va taksilar tekshiruvdan o‘tkazilayotgani ma’lum qilingan. Aholi vakillarining aytishicha, nazoratchilar ayrim ayollarning kiyimlarini Tolibon standartlariga mos emas deb baholagan.
Tolibon 2021-yilda hokimiyatga qaytganidan buyon ayollar va qizlarga nisbatan qator cheklovlarni joriy etgan. Inson huquqlari tashkilotlari ma’lumotlariga ko‘ra, bu davrda ayollarning ta’lim, mehnat va jamoat hayotidagi ishtirokini cheklovchi 100 dan ortiq farmon qabul qilingan.
Avvalroq, Tolibon yetakchisi tomonidan “Turmush o‘rtoqlarni ajratish tamoyillari” deb nomlangan 31 moddadan iborat hujjat tasdiqlangani, unda qizlar 12 yoshida turmushga chiqishlari mumkin va bunday nikohni bekor qilish deyarli imkonsizligi ma’lum qilingan edi.
