Afg‘onistonda endi 9 yoshli qizlarga turmushga chiqishiga ruxsat berildi
Tolibon rahbariyati ayollar huquqlari “Islom shariati asosida himoya qilinayotganini” ta’kidlagan.
Tolibon harakati qizlar uchun minimal nikoh yoshiga oid cheklovni bekor qildi. Bu haqda The Times nashri xabar berdi.
Afg‘onistonlik inson huquqlari faoli Xoriya Mosadiqning ma’lum qilishicha, yangi tartibga ko‘ra, agar qiz 9 yoki 10 yoshida balog‘atga yetgan deb hisoblanadigan bo‘lsa, u nikoh yoshiga yetgan sifatida qaraladi.
Tolibon hokimiyat tepasiga kelishidan avval mamlakat qonunchiligida qizlar uchun minimal nikoh yoshi 16 yosh etib belgilangan edi. Avvalroq, Tolibon yetakchisi tomonidan “Turmush o‘rtoqlarni ajratish tamoyillari” deb nomlangan 31 moddadan iborat hujjat tasdiqlangani, unda qizlar 12 yoshida turmushga chiqishlari mumkin va bunday nikohni bekor qilish deyarli imkonsizligi ma'lum qilingan edi.
Xalqaro nashrlar ayrim sunniy islom huquqi maktablarida balog‘at yoshi 9 yosh deb talqin qilinishini ham qayd etmoqda.
Tolibonning oliy rahbari Haybatulloh Oxundzoda avvalroq harakat afg‘on ayollarini “an’anaviy zulm”dan ozod qilgani va ularning huquqlari “Islom shariati asosida himoya qilinayotgani”ni ta’kidlagan edi. U, shuningdek, ayollar bilan bog‘liq muammolarni mamlakatdagi 20 yillik xorijiy harbiy ishtirok oqibatlari bilan izohlagan.
