АҚШ ва Эрон ҳарбий ҳаракатларни тўхтатиш бўйича келишувга эришди
Келишувни расмий имзолаш маросими 19-июн куни Женевада ўтказилиши режалаштирилмоқда.
АҚШ ва Эрон ўртасида ҳарбий ҳаракатларни тўхтатишни назарда тутувчи тинчлик келишуви бўйича келишувга эришилди. Бу ҳақда Покистон Бош вазири Шаҳбоз Шариф маълум қилди.
Унинг таъкидлашича, узоқ давом этган ва интенсив музокаралар натижасида томонлар барча йўналишларда, жумладан Ливан ҳудудида ҳам ҳарбий ҳаракатларни дарҳол тўхтатишга келишиб олган.
Маълум қилинишича, келишувни расмий имзолаш маросими 19 июн куни Женева шаҳрида бўлиб ўтиши режалаштирилган. Музокараларда воситачи сифатида қатнашган Покистон АҚШ ва Эронга, шунингдек, жараёнда иштирок этган Қатар, Саудия Арабистони ва Туркияга миннатдорлик билдирган.
АҚШ президенти Доналд Трамп ҳам Эрон билан келишув якунлангани ҳақида маълум қилган. У келишув доирасида Ҳормуз бўғозини қайта очиш ва минтақадаги айрим чекловларни бекор қилиш масалалари кўриб чиқилганини билдирган.
Эрон Ташқи ишлар вазири ўринбосари Козим Ғарибободий эса АҚШ билан келишув матни якунланганини тасдиқлаб, ҳужжат Швейтсарияда имзоланиши кутилаётганини маълум қилган.
Унинг сўзларига кўра, меморандум имзолангач, томонлар 60 кун давомида якуний тинчлик шартномасини ишлаб чиқиш бўйича қўшимча музокаралар олиб боради. Шу давр мобайнида келишув бандларининг бажарилиши устидан назорат ўрнатилади.
Шунингдек, АҚШ вице-президенти Ж. Д. Ванcе Женевадаги имзолаш маросимида иштирок этиши мумкинлиги маълум қилинган. Айрим манбаларга кўра, маросимда президент Доналд Трампнинг ҳам қатнашиши эҳтимолдан холи эмас.
