Банкоматдаги носозликлар учун банклар жаримага тортилади
Фуқаролар мурожаатлари билан ишлаш самарадорлиги бўйича энг ёмон натижа қайд этган банклар ҳам эълон қилиб борилади.
Марказий банк август ойидан бошлаб банкоматлар орқали нақд пул ечиб олишда юзага келадиган айрим носозликлар ва мижозларга хизмат кўрсатишдаги қоидабузарликлар учун банкларга молиявий жарималар қўллашни бошлайди. Бу ҳақда Марказий банк раиси Тимур Ишметов Сенатнинг 13 июнь кунги ялпи мажлисида маълум қилди.
Мажлисда қайд этилишича, 2025 йилда банкоматлар орқали нақд пул ечиб олиш билан боғлиқ 290 мингта муаммоли ҳолат аниқланган. Шу масала юзасидан 3 мингдан ортиқ фуқаро ички ишлар органларига мурожаат қилган.
Тимур Ишметовнинг айтишича, ўтган йили банкоматлар орқали 341 миллион операция амалга оширилган бўлиб, муаммоли транзаксиялар улуши 0,08 фоизни ташкил этган
.
Унга кўра, бундай ҳолатларнинг аксарияти банклар фаолияти билан боғлиқ эмас. Жумладан, айрим ҳолларда банкоматда керакли номиналдаги купюраларнинг йўқлиги, карта блокланиши, ПИН-коднинг нотўғри киритилиши, алоқа ёки электр таъминотидаги узилишлар муаммоларга сабаб бўлган.
Марказий банк раиси бевосита банклар ва тўлов тизимлари операторлари фаолияти билан боғлиқ ҳолатлар қарийб 46 мингта ёки жами мурожаатларнинг 15 фоизини ташкил этишини таъкидлади.
Унинг маълум қилишича, Марказий банк истеъмолчилар ҳуқуқларини ҳимоя қилиш ва хизмат сифати учун банклар масъулиятини оширишга қаратилган бир қатор меъёрий ҳужжатларни ишлаб чиққан. Улардан биринчиси 6 августдан кучга киради ва банкоматлар билан боғлиқ хизмат кўрсатишдаги қоидабузарликлар учун молиявий жарималар қўллаш имконини беради.
Шунингдек, фуқароларнинг мурожаатлари билан ишлаш самарадорлигини баҳоловчи махсус индекс жорий этилади. Унинг натижалари асосида энг паст кўрсаткич қайд этган банклар эълон қилиб борилади.
