FIFА австралиялик ҳакамни қўл ишораси сабаб текширмоқда
Унинг трансляция вақтида намойиш этилган қўл ишораси оқ танлилар устунлигини тарғиб қилувчи рамз сифатида талқин қилинмоқда.
FIFА 2026 йилги Жаҳон чемпионатида ишлаётган австралиялик VAR ҳаками Шон Эвансга нисбатан текширув бошлади. Бунга Германия ва Кюрасао терма жамоалари ўртасидаги учрашув олдидан трансляция вақтида намойиш этилган қўл ишораси сабаб бўлган.
Хюстонда бўлиб ўтган “E” гуруҳи учрашуви олдидан ҳакамлар бригадаси томошабинларга таништирилаётган пайтда Эванс ўнг қўлининг бош ва кўрсаткич бармоқлари билан ишора қилгандек кўринган.
Мазкур ҳолат ижтимоий тармоқларда кенг муҳокамаларга сабаб бўлган. Айрим фойдаланувчилар ушбу ишорани оқ танлилар устунлигини тарғиб қилувчи рамз сифатида талқин қилган бўлса, бошқалар Эвансни ҳимоя қилиб, бу Австралияда машҳур бўлган “Circle Gamе” номли оддий ҳазил эканини билдиришган.
Ишоранинг асл маъноси аниқ бўлмаса ҳам футбол муҳлислари ҳакамни турнирдан четлатишга чақирган. Ҳозирча FIFА текширув юзасидан қўшимча маълумот бермаган.
Маълумот учун, Шон Эванс FIFА 2026 Жаҳон чемпионатига жалб этилган тўрт нафар австралиялик ҳакамлардан бири ҳисобланади. У 2024 йилда Австралия Профессионал Футбол Ҳакамлари Ассоциацияси томонидан йил ҳаками деб топилган. У, шунингдек, жорий мавсумда “Auckland” ва “Sydney” жамоалари ўртасидаги А-Лига гранд финалида VAR ҳаками сифатида фаолият юритган.
Абдужалилов Дониёр тайёрлади
