Наманганда 1 килограммдан ортиқ гашиш олиб кетаётган шахс қўлга олинди
Гумонланувчи моддаларни Тошкент шаҳридаги мижозларга етказиш ва сотишни режалаштирган.
Гиёҳвандлик воситаларининг ноқонуний айланмасига қарши курашиш доирасида Давлат хавфсизлик хизмати ва ички ишлар органлари ходимлари томонидан навбатдаги тезкор тадбир ўтказилди. Бу ҳақда ДХХ Zamon.uz'га хабар берди.
Тадбир давомида “Қўқон – Тошкент” йўналишида ҳаракатланаётган, 1995 йилда туғилган Тошкент шаҳрида яшовчи фуқаро бошқарувидаги “Voyah” русумли автомашина Наманган вилояти Поп туманидаги “Наманган” ЙПХ масканида тўхтатилиб, белгиланган тартибда кўздан кечирилган.
Текширув жараёнида автомашина салонидаги ўриндиқ остига яширилган қора рангли целлофан пакет ичидан соф оғирлиги 1 килограмм 178 грамм бўлган “гашиш” гиёҳвандлик воситаси ҳамда 8 дона “Регапен” номли кучли таъсир қилувчи дори воситаси аниқланиб, ашёвий далил сифатида расмийлаштирилган.
Дастлабки маълумотларга кўра, гумонланувчи ушбу ноқонуний моддаларни Тошкент шаҳридаги мижозларга етказиш ва сотишни режалаштирган.
Мазкур ҳолат юзасидан унга нисбатан жиноят иши қўзғатилиб, қамоқ эҳтиёт чораси қўлланган. Ҳозирда тергов ҳаракатлари давом эттирилмоқда.
