Самарқандда Damas даҳшатли аварияга учради
Ҳайдовчи транспорт воситаларини қувиб ўтиш мақсадида асфалт қопламаси бўлмаган йўл четидан юқори тезликда ҳаракатланган.
Самарқанд вилоятида Damas автомобили иштирокида йўл-транспорт ҳодисаси содир бўлди. Оқибатда ҳайдовчи турли тан жароҳатлари олиб, шифохонага ётқизилган.
Йўл ҳаракати хавфсизлиги хизмати маълумотига кўра, ҳодиса 9 июн куни соат 18:10 атрофида Пахтачи туманидаги “Мирза Олим” маҳалласи ҳудудидан ўтувчи М-37 автомобил йўлининг 138-километрида юз берган.
Аниқланишича, Damas ҳайдовчиси ўзидан олдинда ҳаракатланаётган транспорт воситаларини қувиб ўтиш мақсадида асфалт қопламаси бўлмаган йўл четидан юқори тезликда ҳаракатланган. Натижада у автомобил бошқарувини йўқотиб, ўзи билан бир йўналишда кетаётган юк машинасининг орқа қисмига бориб урилган.
ЙТҲ оқибатида Damas ҳайдовчиси, 35 ёшли А.Р. тан жароҳатлари олиб, тиббиёт муассасасига олиб борилган.
Мазкур ҳолат юзасидан Пахтачи тумани Йўл ҳаракати хавфсизлиги бўлими томонидан суриштирув ишлари олиб борилмоқда.
Эслатиб ўтамиз, аввалроқ Сурхондарёда Damas ва Nexia ўртасидаги пойга оқибатида икки киши ҳалок бўлгани ҳақида хабар берилган эди.
