Тошкентнинг барча туманларида Ўзбекистон МТЖ ўйинлари катта экранларда намойиш этилади

Футбол бўйича Ўзбекистон миллий терма жамоасининг Жаҳон чемпионати гуруҳ босқичидаги учрашувлари Тошкент шаҳрининг барча туманларида ташкил этиладиган махсус томоша майдонларида тўғридан-тўғри намойиш этилади. Бу ҳақда пойтахт ҳокимлиги хабар берди.

 

Томоша майдонлари Бектемир туманидаги Роҳат маҳалласи, Миробод туманидаги “Фурқат” боғи, Мирзо Улуғбек туманидаги “Cентрал Park”, Олмазор туманидаги “Ғалаба боғи”, Сергели туманидаги Марказий хиёбон, Учтепа туманидаги “Сеул Эко парк”, Чилонзор туманидаги “Ғафур Ғулом” боғи, Шайхонтоҳур туманидаги “Анҳор-Локомотив” боғи, Юнусобод спорт мажмуаси, Яккасарой туманидаги “Дўстлик” боғи, Янгиҳаёт туманидаги INDEX парк ҳамда Яшнобод туманидаги “Ашхобод” сайилгоҳида ташкил этилади.

 

Шунингдек, энг йирик томоша майдони “Бунёдкор” стадиони ҳудудида бўлади. Бу ерда бир вақтнинг ўзида 10 минг нафар мухлис Ўзбекистон терма жамоасини қўллаб-қувватлаши мумкин бўлади.

 

Ўзбекистон миллий терма жамоаси гуруҳ босқичида 18 июнь куни Колумбияга қарши, 23 июнь куни Португалияга қарши ҳамда 28 июнь куни ДР Конго терма жамоасига қарши майдонга тушади. Учрашувлар Тошкент вақти билан мос равишда соат 07:00, 22:00 ва 04:30 да бошланади.

Эслатиб ўтамиз, мамлакат бўйлаб 220 та мактабда ҳам футбол томошалари учун зарур шароитлар яратилади ҳамда Ўзбекистон терма жамоасининг Жаҳон чемпионатидаги ўйинлари катта экранларда жонли эфирда намойиш этилади.