Туркияда “Ўзбекистон маҳалласи” ва Шавкат Мирзиёев булвари очилди

 

Туркиянинг Ҳатай вилоятининг Арсуз туманида Ўзбекистон томонидан бунёд этилган турар-жой мажмуаси негизида ташкил этилган “Ўзбекистон маҳалласи”, Шавкат Мирзиёев булвари ҳамда Тошкент ва Самарқанд кўчаларининг тантанали очилиш маросими бўлиб ўтди. Бу ҳақда Дунё ахборот агентлиги хабар берди.

 

Тадбирда Олий Мажлис Қонунчилик палатаси Спикери Нуриддин Исмоилов бошчилигидаги делегация, Хоразм вилояти ҳокими Жўрабек Раҳимов, Туркия Буюк Миллат Мажлиси раиси Нуман Куртулмуш, Ҳатай вилояти ҳокими Мустафо Масатли ҳамда жамоатчилик вакиллари иштирок этди.

 

Маросимда сўзга чиққан Нуман Куртулмуш мазкур ташаббус Туркия халқининг Ўзбекистон халқига бўлган самимий миннатдорлиги ва икки қардош халқ ўртасидаги мустаҳкам дўстлик рамзи эканини таъкидлаган. Унинг қайд этишича, Арсузда Ўзбекистон тарихий шаҳарлари ва давлат раҳбари номининг абадийлаштирилиши оғир кунларда Туркия билан бирга бўлган ўзбек халқига билдирилган юксак эҳтиром ифодасидир.

 

Ҳатай вилояти ҳокими Мустафo Масатли эса 2023 йил 6 февралдаги вайронкор зилзиладан сўнг Ўзбекистон томонидан кўрсатилган амалий ёрдам турк халқи хотирасида доимо сақланиб қолишини таъкидлаган. У “Ўзбекистон маҳалласи” номининг берилиши икки халқ ўртасидаги қардошлик ва бирдамликнинг ёрқин тимсоли эканини қайд этган.

 

Тадбир якунида иштирокчилар рамзий тасма кесиб, Шавкат Мирзиёев булвари ҳамда Тошкент ва Самарқанд кўчаларини расман очдилар.

 

Қайд этилишича, мазкур турар-жой мажмуаси Ўзбекистоннинг зилзиладан зарар кўрган Ҳатай вилоятини тиклашга қаратилган гуманитар ёрдами натижасида бунёд этилган бўлиб, у икки давлат ўртасидаги стратегик шериклик ва қардошлик муносабатларининг яна бир ёрқин намунаси сифатида баҳоланмоқда.