АҚШ ва Эрон дастлабки сулҳ битимини имзолади

 

АҚШ президенти Доналд Трамп Қўшма Штатлар ва Эрон ўртасида Форс кўрфази минтақасидаги можарони юмшатишга қаратилган дастлабки келишув имзоланганини маълум қилди. Бироқ томонлар узоқ муддатли сулҳ бўйича якуний келишувга ҳали эришмаган.

 

Reuters агентлиги хабарига кўра, янги меморандум аввалроқ эълон қилинган сулҳ муддатини яна 60 кунга узайтиришни назарда тутади. Шунингдек, ҳужжат Эрон томонидан чеклаб қўйилган Ҳормуз бўғози орқали кемалар ҳаракатини тиклаш учун замин яратиши кутилмоқда.

 

Доналд Трампнинг таъкидлашича, келишув тўлиқ имзоланган бўлиб, унинг расмий маросими Женевада ўтказилиши режалаштирилган. АҚШ вице-президенти Жей Ди Венс ҳам ушбу тадбирда иштирок этиши кутилмоқда.

 

Шу билан бирга, Эрон президенти Масъуд Пезешкиан меморандумни ҳарбий ҳаракатларни тўхтатиш йўлидаги муҳим қадам деб баҳолар экан, узоқ муддатли сулҳ бўйича якуний келишув ҳали ишлаб чиқилмаганини қайд этган.

 

АҚШ расмийлари меморандумда Эронга нисбатан санкцияларни юмшатиш, айрим активларни музлатишдан чиқариш ҳамда иқтисодий тикланишга кўмаклашувчи механизмлар назарда тутилганини билдирган. Бунинг эвазига Теҳрондан ядровий қурол дастуридан воз кечиш ва минтақадаги қуролли гуруҳларни қўллаб-қувватлашни тўхтатиш талаб этилмоқда.

 

Reuters қайд этишича, келишув можаронинг кескинлашувини тўхтатиш йўлидаги муҳим қадам сифатида баҳоланаётган бўлсада, унинг аниқ шартлари ва амалий механизмлари ҳозирча тўлиқ ошкор қилинмаган.