Тошкент вилоятида қидирувдаги шахснинг уйидан йирик миқдордаги наркотик топилди

 

Гиёҳвандлик воситаларининг ноқонуний айланмасига қарши курашиш доирасида Давлат хавфсизлик хизмати, Божхона органлари, Чегара қўшинлари ҳамда Ички ишлар органлари ҳамкорлигида Тошкент ва Самарқанд вилоятларида ўтказилган тезкор тадбирлар давомида йирик миқдордаги наркотик моддалар мусодара қилинди. Бу ҳақда ДХХ Zamon.uz'га хабар берди.

 

Тошкент вилоятининг Бекобод шаҳрида ўтказилган тезкор тадбирда Жиноят кодексининг контрабанда ҳамда гиёҳвандлик воситалари билан боғлиқ моддалари билан назарда тутилган жиноятларни содир этганликда гумон қилиниб, 2025 йилдан буён қидирувда бўлган 1992 йилда туғилган шахс ушланган.

 

У томонидан ижарага олинган хонадон холислар иштирокида кўздан кечирилганда, ошхонадаги музлатгич ичидан 151 грамм «опий», ҳожатхона шахтасидан эса 4 килограмм 971 грамм «гашиш» моддаси топилган ва процессуал тартибда расмийлаштирилган.

 

Дастлабки маълумотларга кўра, ушбу наркотик моддалар қўшни давлатдан контрабанда йўли билан олиб кирилган. Гумонланувчига нисбатан «қамоқ» эҳтиёт чораси қўлланилган.

 

Самарқанд вилоятининг Ургут туманида ўтказилган тезкор тадбирда эса 2003 йилда туғилган икки нафар фуқаро шартли харидорга 932 грамм «гашиш» ва 2,5 грамм «опий» моддасини 10 минг АҚШ долларига сотаётган вақтида ашёвий далиллар билан қўлга олинган.

 

Мазкур ҳолат юзасидан жиноят иши қўзғатилиб, гумонланувчиларга нисбатан «қамоқ» эҳтиёт чораси қўлланган. Ҳозирда тергов ҳаракатлари давом эттирилмоқда.