Уругвай терма жамоаси АҚШда итлар ёрдамида текширувдан ўтказилди
Жаҳон чемпионати иштирокчиларига нисбатан кучайтирилган назорат давом этмоқда.
2026 йилги FIFА Жаҳон чемпионати доирасида АҚШга етиб келган Уругвай терма жамоаси кучайтирилган хавфсизлик чораларига мувофиқ текширувдан ўтказилди.
Ижтимоий тармоқларда тарқалган видеоларда футболчилар ва жамоа аъзоларининг юклари ҳамда жиҳозлари хизмат итлари ёрдамида кўздан кечирилгани акс этган. Хабарларга кўра, мазкур текширув Саудия Арабистонига қарши учрашув олдидан амалга оширилган.
Маълум қилинишича, АҚШ, Канада ва Мексикада ўтказилаётган Жаҳон чемпионати давомида хавфсизлик чоралари сезиларли даражада кучайтирилган. Турнир иштирокчилари, расмийлар ва мухлислар стадионлар ҳамда бошқа расмий объектларга киришда бир неча босқичли назоратдан ўтмоқда.
Уругвай терма жамоаси билан боғлиқ текширув ижтимоий тармоқларда кенг муҳокамаларга сабаб бўлди. Айрим мухлислар ва экспертлар бундай назорат чораларини ортиқча деб баҳолаб, FIFА ҳамда АҚШ расмийларини танқид қилган.
Маълумот учун, Уругвай терма жамоаси Жаҳон чемпионатидаги илк учрашувида Саудия Арабистони билан 1:1 ҳисобида дуранг ўйнаган эди.
Эслатиб ўтамиз, аввалроқ АҚШга борган Ўзбекистон терма жамоаси ҳам кучайтирилган тартибда текширувдан ўтказилгани хабар қилинган эди.
