Ўзбекистон ва Қозоғистонда мигрантларни қабул қилиш марказлари бўйича келишувлар йўқ — EИ
Европа Иттифоқи Марказий Осиёда мигрантлар марказларини очиш юзасидан ҳозирча ҳеч қандай музокаралар олиб борилмаганини маълум қилди.
Европа Иттифоқининг Марказий Осиё бўйича махсус вакили Эдуардс Стипраис Қозоғистон ва Ўзбекистон ҳудудида мигрантларни қабул қилиш марказларини ташкил этиш масаласи бўйича ҳеч қандай музокаралар олиб борилмаганини маълум қилди дейди ТАСС.
Унинг таъкидлашича, Европа Иттифоқи Остона ва Тошкент билан Европа мамлакатларида бошпана олиш ҳуқуқига эга бўлмаган мигрантларни жойлаштириш учун махсус марказлар яратиш юзасидан музокаралар ўтказмаган ва бундай жараён ҳозирда ҳам мавжуд эмас.
“Бундай музокаралар бўлмаган ва ҳозир ҳам олиб борилмаяпти”, — деган Стипраис.
Шу билан бирга, у Европа Иттифоқи даражасида назарий жиҳатдан шундай марказларни ташкил этиш имконини берувчи қонунчилик қабул қилинганини қайд этган. Бироқ ҳозирча бу борада аниқ амалий қарорлар ёки келишувлар мавжуд эмас.
Аввалроқ Политисо нашри дипломатик манбаларга таяниб, айрим Европа давлатлари мигрантларни қайтариш ва бошпана сўровларини кўриб чиқиш марказларини Европа Иттифоқидан ташқарида ташкил этиш имкониятларини ўрганаётгани ҳақида хабар берган эди. Нашрда Қозоғистон ва Ўзбекистон эҳтимолий жойлашув ҳудудлари сифатида тилга олинган.
Бироқ кейинчалик ҳам Қозоғистон, ҳам Ўзбекистон расмийлари бу масала юзасидан Европа Иттифоқи билан музокаралар олиб борилаётганини рад этган.
