АҚШ Сенати Эрон билан урушни тўхтатиш ҳақидаги резолюцияни яна рад этди
47 сенатор резолюцияни қўллаб-қувватлаган бўлса, 48 нафари унга қарши овоз берган.
АҚШ Сенати президент маъмуриятига Эронга қарши ҳарбий ҳаракатларни тўхтатишни назарда тутувчи резолюцияни навбатдаги овоз беришда ҳам рад этди.
Конгресс юқори палатасида ўтказилган процедуравий овоз беришда ҳужжатни 47 нафар сенатор қўллаб-қувватлаган бўлса, 48 нафари унга қарши овоз берган. Республикачилар партиясининг тўрт нафар вакили резолюцияни ёқлаб овоз берган, Демократлар партиясидан эса бир сенатор ҳужжатга қарши чиққан.
Мазкур ташаббус АҚШ президентининг Эронга қарши ҳарбий куч ишлатишини Конгресс розилигисиз чеклашни назарда тутади. АҚШ Конституциясига кўра, уруш эълон қилиш ваколати Конгрессга тегишли бўлса-да, сўнгги ўн йилликларда Америка президентлари хориждаги ҳарбий операцияларни бошлаш бўйича ваколатларини кенг талқин қилиб келмоқда.
Шу боис Конгресснинг айрим аъзолари президент Дональд Трамп маъмуриятидан Эронга қарши ҳарбий куч ишлатиш масаласида қонунчилар розилигини олишни талаб қилувчи бир қатор резолюцияларни илгари сурган. Бироқ, ҳозиргача бундай ташаббусларнинг бирортаси ҳам Конгресснинг иккала палатасидан тўлиқ ўта олмаган.
Аввалроқ АҚШ, Эрон ва воситачи давлат сифатида Покистон вакиллари Яқин Шарқдаги можарони тугатишга қаратилган келишувга эришилганини тасдиқлаган эди. Томонлар ўртасидаги расмий имзолаш маросими 19 июн куни Женевада ўтказилиши режалаштирилган.
