“Бизнесни ривожлантириш банки” АТБ ва Standard Chartered ўртасида ўзаро ҳамкорлик истиқболлари муҳокама қилинди

Жорий йилининг 16 июнь куни Бешинчи Тошкент халқаро инвестиция форуми доирасида “Бизнесни ривожлантириш банки” АТБ раҳбарияти ҳамда Standard Chartered банкининг Бош ижрочи директори жаноб Сайф Малик бошчилигидаги делегация ўртасида расмий учрашув бўлиб ўтди.

 

 

Музокаралар давомида томонлар халқаро молия бозорларидаги сўнгги тенденциялар, икки томонлама манфаатли ҳамкорликни янада кенгайтириш истиқболлари ҳамда банклараро муносабатларни мустаҳкамлаш масалаларини муҳокама қилдилар. Хусусан, халқаро қарз бозорларида иштирок этиш, синдитсирланган кредит линияларини жалб қилиш ва савдони молиялаштириш дастурларини ривожлантириш бўйича фикр алмашилди.

 

 

Standard Chartered банки Ўзбекистонда амалга оширилаётган иқтисодий ислоҳотлар ва банк-молия секторидаги трансформация жараёнларини юқори баҳолаб, “Бизнесни ривожлантириш банки” АТБ билан узоқ муддатли ва стратегик шериклик муносабатларини ривожлантиришга тайёр эканлигини билдирди.

 

 

Мазкур учрашув “Бизнесни ривожлантириш банки” АТБнинг халқаро молия институтлари билан ҳамкорлик алоқаларини мустаҳкамлаш, республика иқтисодиётига узоқ муддатли хорижий капитални жалб қилиш ҳамда халқаро молия бозорларидаги иштирокини кенгайтириш йўлидаги муҳим қадамлардан бири бўлди.