Ҳиндистонда Telegram вақтинча чеклаб қўйилди
Павел Дуров Telegram блокланиши 150 миллион фойдаланувчига таъсир қилганини айтиб, қарорни танқид қилган.
Ҳиндистон ҳукумати NEET имтиҳонини қайта топшириш арафасида фирибгарлик хавфи кучайгани сабабли Telegram мессенжерининг фаолиятини 22 июнга қадар вақтинча чеклади.
Миллий тест агентлиги (NTA) маълумотларига кўра, айрим шахслар Telegram каналлари орқали имтиҳон материалларига пуллик кириш имкониятини таклиф қилган. Шу муносабат билан ҳукумат имтиҳон жараёнининг шаффофлигини таъминлаш мақсадида мессенжер фаолиятига вақтинчалик чекловлар жорий этган.
Telegram асосчиси Павел Дуров ушбу қарорни танқид қилиб, блоклаш 150 миллиондан ортиқ фойдаланувчига таъсир қилганини ва бу нотўғри қарор бўлганини таъкидлаган.
Унинг сўзларига кўра, Telegram сўнгги ҳафталарда Ҳиндистонда имтиҳон материаллари ва фирибгарлик билан боғлиқ юзлаб каналларни ўчириб ташлаган. Дуров, шунингдек, платформани блоклаш маълумотлар тарқалишини тўхтатмаганини, чунки ноқонуний контент бошқа иловаларга кўчиб ўтганини қайд этган.
Аввалроқ Ҳиндистон расмийлари имтиҳон жавоблари муддатидан олдин тарқалганидан сўнг NEET тест натижаларини бекор қилган эди.
