Саида Мирзиёева АҚШ молия институтлари раҳбарлари билан учрашди
Мулоқотда қўшма инвестиция платформасини ривожлантириш мавзусига алоҳида эътибор қаратилди.
Тошкент халқаро инвестиция форуми доирасида Президент администрацияси раҳбари Саида Мирзиёева АҚШ Эксимбанки президенти Жон Ёванович ҳамда Халқаро молиявий тараққиёт корпорацияси бош ижрочи директори Бен Блек билан учрашув ўтказди.
Саида Мирзиёеванинг маълум қилишича, мулоқот чоғида саноат ва молия соҳаларидаги амалдаги ҳамда истиқболдаги лойиҳаларни кенгайтириш масалалари муҳокама қилинган.
Томонлар, шунингдек, қўшма инвестиция платформасини ривожлантириш истиқболларига алоҳида эътибор қаратган.
Унинг таъкидлашича, Тошкент инвестиция форуми Ўзбекистоннинг хорижий ҳамкорлари билан амалдаги лойиҳалар юзасидан режаларни мувофиқлаштириш учун муҳим майдон вазифасини ўтамоқда.
Саида Мирзиёева АҚШ вакиллари Ўзбекистондаги бизнес имкониятлари билан бир қаторда мамлакатнинг бой тарихи ва маданиятига ҳам катта қизиқиш билдираётганини қайд этди.
