Саида Мирзиёева Россия Ҳукумати раиси билан учрашув ўтказди
Учрашувда икки мамлакат ўртасидаги савдо-иқтисодий ҳамкорликнинг бугунги ҳолати ва янги қўшма лойиҳалар истиқболлари муҳокама қилинди.
Тошкент халқаро инвестиция форуми доирасида Президент администрацияси раҳбари Саида Мирзиёева Россия Федерацияси Ҳукумати Раиси Михаил Мишустин билан учрашув ўтказди.
Учрашув чоғида томонлар Ўзбекистон ва Россия ўртасидаги савдо-иқтисодий ҳамкорликнинг бугунги ҳолати ҳамда уни янада ривожлантириш истиқболларини муҳокама қилди.
Саида Мирзиёеванинг таъкидлашича, икки мамлакат ўртасидаги муносабатлар изчил ривожланиб бормоқда. Ҳозирда бизнес, инфратузилма ва маданият соҳаларида қатор қўшма лойиҳалар амалга оширилмоқда.
Шунингдек, яқин кунларда Ҳукуматлараро комиссия ҳамда Ҳудудлар кенгашининг навбатдаги йиғилишлари ўтказилиши режалаштирилган.
Томонлар ушбу тадбирлар Ўзбекистон-Россия шериклигини янада мустаҳкамлашга хизмат қилишига ишонч билдирди.
