Ўзбекистон ерости бойликлари қиймати 3 трлн доллар деб баҳоланди
Ушбу соҳадаги имкониятларни хорижий инвесторларга тақдим этиш мақсадида очиқ рақамли геология маълумотлар базаси яратилади.
Ўзбекистон саноатнинг барча тармоқларида янги технологик босқичга ўтиш ва юқори қўшилган қиймат яратишга қаратилган йирик дастурларни амалга оширмоқда. Бу ҳақда Президент Шавкат Мирзиёев инвестиция форумидаги нутқида маълум қилди.
Давлат раҳбарининг таъкидлашича, Ўзбекистон олтин, мис, уран, вольфрам, газ ва бошқа стратегик хомашё захираларига бой бўлиб, ер ости бойликларининг умумий қиймати 3 триллион долларга баҳоланади.
Ушбу соҳадаги имкониятларни хорижий инвесторларга тақдим этиш мақсадида очиқ рақамли геология маълумотлар базаси яратилади. Шунингдек, аукционга чиқариладиган конлар сони тўрт баробарга оширилади.
Президентнинг қайд этишича, хомашёни чуқур қайта ишлаш ва тайёр маҳсулот ишлаб чиқаришга қаратилган лойиҳаларни ривожлантириш учун Тошкент ва Самарқандда ташкил этилаётган “Келажак металлари” технопаркларига хорижий инвестициялар фаол жалб этилади.
Бундан ташқари, машинасозлик, робототехника, енгил саноат, қурилиш материаллари, электротехника ва фармацевтика каби устувор тармоқларда умумий қиймати 20 миллиард долларлик инвестиция лойиҳаларини ҳамкорликда амалга ошириш таклиф этилди.
