"Ўзбекистон иқтисодиёти 2026 йилда 180 млрд доллардан ошиши кутилмоқда" — Президент
Давлат раҳбари Ўзбекистон тенг ҳуқуқли ва ўзаро манфаатли ҳамкорликка тайёр инвесторлар учун доимо очиқ эканини таъкидлади.
Президент Шавкат Мирзиёев Тошкент халқаро инвестиция форумининг ялпи мажлисида сўзлаган нутқида Ўзбекистон иқтисодиёти жадал суръатларда ўсиб бораётганини таъкидлаб, 2026 йил якунига қадар мамлакат ялпи ички маҳсулоти 180 миллиард доллардан ошиши кутилаётганини маълум қилди.
“Кўпчиликнинг йодида, биз тўрт йил аввал бўлиб ўтган илк форумда 2026 йил якунига келиб, Ўзбекистоннинг ялпи ички маҳсулотини 100 миллиард долларга етказишни мақсад қилган эдик. Жадал суръатларда ўсиб бораётган иқтисодиётимиз бу йил 180 миллиард доллардан ошиши кутилмоқда!”, – деди Президент.
Президентнинг айтишича, ўтган йилда Ўзбекистон иқтисодиёти 7,7 фоизга ўсган, иқтисодиётга 43 миллиард доллар инвестиция жалб этилган. Шунингдек, мамлакатнинг халқаро захиралари 70 миллиард доллардан ошган.
Президент сўнгги йилларда Ўзбекистонга 150 миллиард доллардан ортиқ хорижий инвестиция жалб қилинганини, шундан 123 миллиард доллари охирги беш йил ҳиссасига тўғри келишини қайд этди.
Давлат раҳбари Ўзбекистон тенг ҳуқуқли ва ўзаро манфаатли ҳамкорликка тайёр инвесторлар учун доимо очиқ эканини таъкидлади.
