Ўзбекистонда суверен ислом облигациялари – сукук дастури амалга оширилади
Халқаро клиринг компаниялари фаолияти учун ҳам кенг имкониятлар яратилади.
Президент Шавкат Мирзиёев Тошкент халқаро инвестиция форумида Ўзбекистонда инвестиция оқимини диверсификация қилиш мақсадида суверен ислом облигациялари — сукук дастурини амалга ошириш бошланишини маълум қилди.
Давлат раҳбарининг таъкидлашича, мамлакатда халқаро клиринг компаниялари фаолияти учун ҳам кенг имкониятлар яратилади. Ушбу чора-тадбирлар маҳаллий корхоналарга келгусида камида 10 миллиард доллар қўшимча капитал жалб этишга хизмат қилиши кутилмоқда.
Президент, шунингдек, хусусийлаштириш дастури доирасида жорий йилда 6 миллиард долларлик кўчмас мулк объектлари, корхоналардаги давлат улуши ҳамда ер участкалари аукционга чиқарилишини билдирди.
Шавкат Мирзиёев маҳаллий ва хорижий инвесторларни яратилаётган янги имкониятлардан фаол фойдаланишга чақирди.
