Зеленский Трамп ва Макрон билан учрашди, Украина тинчлик музокараларини жонлантиришга уринмоқда
Учрашувдан сўнг Зеленский G7 давлатлари Украина ҳаво мудофааси салоҳиятини мустаҳкамлаш бўйича келишувга эришганини билдирди.
Украина президенти Володимир Зеленский G7 саммити доирасида АҚШ президенти Доналд Трамп ва Франция президенти Эммануэл Макрон билан учрашди. Бу Зеленский ва Трампнинг сўнгги тўрт ой ичидаги илк мулоқоти бўлди, дея ёзмоқда The Kyiv Indipendent.
Манбаларга кўра, қарийб 30 дақиқа давом этган учрашувда Украинадаги уруш, тинчлик музокаралари истиқболлари ҳамда Киевнинг ҳаво ҳужумидан мудофаа имкониятларини кучайтириш масалалари муҳокама қилинган.
Зеленский Трампга Россия ҳужумлари оқибатида зарар кўрган Киев-Печерск Лавраси суратларини кўрсатган. Шунингдек, Украина президенти АҚШ билан баллистик ракеталарга қарши мудофаа тизимлари ва ракеталарни ишлаб чиқариш бўйича ҳамкорлик масаласини ҳам кўтарганини маълум қилди.
Учрашувдан сўнг Зеленский G7 давлатлари Украина ҳаво мудофааси салоҳиятини мустаҳкамлаш бўйича келишувга эришганини билдирди. Трамп эса Россия урушни тугатиш учун келишувга эришиши кераклигини таъкидлади.
Мазкур мулоқот Украина Россия президенти Владимир Путин билан тўғридан-тўғри музокараларни йўлга қўйишга уринаётган бир пайтда бўлиб ўтди. Зеленский аввалроқ Трамп кўмагида ўзи ва Путин иштирокидаги уч томонлама учрашув ташкил этилишига умид билдирган эди.
Бироқ Кремль ҳозирча Зеленский билан нейтрал ҳудудда учрашиш таклифларини қўллаб-қувватламаяпти. Путин эса яқинда Украина президенти билан учрашишдан маъно кўрмаслигини маълум қилганди.
