БААда 15 ёшгача бўлган болаларга ижтимоий тармоқлар тақиқланди
15–16 ёшдаги ўсмирлар учун ҳам махсус чекловлар жорий қилинади.
Бирлашган Араб Амирликлари ҳукумати болаларнинг рақамли макондаги хавфсизлигини таъминлашга қаратилган янги қоидаларни тасдиқлади. Унга кўра, 15 ёшгача бўлган болаларга ижтимоий тармоқ платформаларида аккаунт очиш ва улардан фойдаланиш тақиқланади.
WАМ хабарига кўра, янги тартиб ижтимоий тармоқлардан фойдаланишнинг минимал ёшини 15 ёш этиб белгилайди. Мазкур ёшга етмаган фойдаланувчиларга шахсий аккаунт яратиш, ижтимоий тармоқларда пост жойлаштириш, изоҳ қолдириш, маълумот алмашиш ҳамда очиқ гуруҳ ва каналларга қўшилиш тақиқланади.
15–16 ёшдаги ўсмирларга эса ижтимоий тармоқлардан фойдаланишга рухсат берилади, бироқ уларнинг аккаунтлари қатор чекловлар асосида ишлайди. Жумладан, платформалар ушбу ёш тоифаси учун контентни фильтрлаши, фойдаланиш вақтини чеклаши ва нотаниш фойдаланувчилар билан мулоқот қилиш имкониятини чеклаши лозим бўлади.
Шунингдек, ижтимоий тармоқларга вояга етмаганларнинг шахсий маълумотларидан тижорат мақсадларида фойдаланиш ҳамда уларга мақсадли реклама намойиш этиш тақиқланади. Ҳукумат ота-оналарнинг розилиги ҳам ушбу чекловларни бекор қилиш учун асос бўла олмаслигини таъкидлади.
Янги қоидаларга мувофиқ, платформалар рақамли идентификация ёки биометрик маълумотлар асосида фойдаланувчиларнинг ёшини аниқлаш механизмларини жорий этиши керак бўлади. Бунинг учун уларга 12 ойлик мослашув даври берилган.
Қоидалар бузилган тақдирда, БАА расмийлари ижтимоий тармоқ платформаларига нисбатан маъмурий жарималар қўллаши ёки уларнинг фаолиятини қисман ёки тўлиқ чеклаши мумкин.
