Эрон ва Қўшма Штатлар 19 июнь куни Швейтсарияда музокаралар ўтказади
Музокараларда воситачилик қилувчи Покистон, Қатар ҳамда бошқа манфаатдор давлатлар делегациялари ҳам иштирок этади.
Швейтсария Ташқи ишлар вазирлиги жума куни АҚШ ва Эрон вакиллари ўртасида дастлабки музокаралар Бюргенсток шаҳрида бўлиб ўтиши режалаштирилганини тасдиқлади. Бу ҳақда Reuters хабар бермоқда.
Маълумотларга кўра, учрашувда аввал эришилган келишувларни амалиётга жорий этиш масалалари муҳокама қилинади. Музокаралар “келишувни амалга ошириш бўйича дастлабки маслаҳатлашувлар” форматида ўтказилиши кутилмоқда.
Учрашувда АҚШ ва Эрон вакиллари билан бир қаторда, жараёнда воситачилик қилувчи Покистон, Қатар ҳамда бошқа манфаатдор давлатлар делегациялари ҳам иштирок этади.
Швейтсария ТИВ маълумотида қайд этилишича, музокаралар томонлар ўртасидаги келишувларни амалга оширишга қаратилган амалий қадамларни мувофиқлаштириш учун хизмат қилади.
Аввалроқ АҚШ президенти Доналд Трамп Эрон билан ўзаро англашув меморандуми имзоланганини маълум қилган эди. Эрон томони ҳам ушбу келишувни тасдиқлаган.
Ҳозирда Бюргенстокдаги музокаралар Вашингтон ва Теҳрон ўртасидаги кескинликни юмшатиш ҳамда барқарор мулоқот жараёнини шакллантиришга қаратилган.
Эслатиб ўтамиз, аввалроқ АҚШ ва Эрон дастлабки тинчлик шартномасини имзолагани тўғрисида хабар берилган эди.
