Футболчиларимдан ғурурланаман — Фабио Каннаваро
Ўзбекистон миллий терма жамоаси бош мураббийи Колумбияга қарши бўлган баҳсни тарихий ўйин деб атади.
Колумбияга қарши учрашувдан сўнг ташкил этилган матбуот анжуманида Ўзбекистон миллий терма жамоаси бош мураббийи Фабио Каннаваро баҳс ҳақида ўз фикрлари билан ўртоқлашди.
Италиялик мутахассис учрашув қизиқарли кечганини таъкидлаб, жамоа иккинчи бўлимда ўйин суръатини ўзгартиришга муваффақ бўлганини қайд этган.
"Ўйин қизиқарли ўтди. Иккинчи бўлимда ўйинни ўзгартиришга эришдик. Айниқса, чап қанот орқали бир нечта имкониятлар яратдик ва ўйин назоратини ўз қўлимизга олишга ҳаракат қилдик", — деган Каннаваро.
"Биз аввало Ўзбекистонни бутун дунёга ижобий томондан кўрсатиш учун бу ерга келдик. Футболчиларимга доим ўйин давомида фаол ҳаракат қилиш кераклигини айтаман. Колумбия каби кучли жамоаларга қарши, айниқса тўпсиз ҳаракат қилиш осон эмас", — дея таъкидлаган у.
Фабио Каннаваро иккинчи бўлимдаги ўйинидан қониққанини, бироқ ўтказиб юборилган гол жамоа учун ачинарли бўлганини қайд этди.
"Биз ушбу стадиондаги баҳсни узоқ вақт эслаб қоламиз. Чунки бу тарихий ўйин. Ўзбекистон Жаҳон чемпионатида иштирок этмоқда. Умуман олганда, бугунги ўйин биз учун фойдали тажриба бўлди. Айрим хатолар кузатилди ва биз улар устида ишлаймиз", — деган бош мураббий.
Мутахассис футболчиларнинг ҳаракатидан мамнунлигини билдириб: "Футболчиларимдан фахрланаман. Улар яхши ўйин намойиш этишди. Бугун қийин баҳс бўлди. Бундай стадион ва минглаб мухлислар қаршисида ўйнаш осон эмас. Бироқ айнан шундай муҳит футболчиларга қўшимча мотивация ҳам беради", — дея таъкидлади Фабио Каннаваро.
