Робахон Маҳмудова Олий суд раиси этиб сайланди
Президент томонидан Робахон Маҳмудовани Олий суд раиси лавозимига сайлаш тўғрисида Сенатга тақдимнома киритилди.
Президент томонидан Робахон Анваровна Маҳмудовани Ўзбекистон Республикаси Олий суди раиси лавозимига сайлаш тўғрисидаги тақдимнома Олий Мажлис Сенатига киритилди.
Олий Мажлис Сенати Кенгашининг мажлисида Президент томонидан Олий суд раиси лавозимига киритилган номзод кўриб чиқилиб, Робахон Анваровна Маҳмудовани судьялик лавозимида бўлишнинг муддатсиз даврига ва Олий суд раиси лавозимига беш йил муддатга сайлаш тўғрисидаги қарор қабул қилинди.
Маълумот ўрнида, Робахон Маҳмудова Олий Мажлис Қонунчилик палатасидаги “Адолат” социал-демократик партияси фракциясининг раҳбари. У 2023-йилги президентлик сайловида “Адолат” партиясидан номзод сифатида ҳам иштирок этган.
Шунингдек, у аввал Ўзбекистон Олий суди раисининг биринчи ўринбосари — маъмурий ишлар бўйича судлов ҳайъати раиси, Жиноят ишлари бўйича Фарғона вилояти суди раиси, Президентнинг Фарғона вилоятидаги Халқ қабулхонаси мудири ҳамда Сенатнинг Фан, таълим ва соғлиқни сақлаш масалалари қўмитаси раиси лавозимларида фаолият юритган.
Бунга қадар Олий суд раиси лавозимида ишлаб келган Бахтиёр Исломовни лавозимдан озод этиш тўғрисида Олий Мажлис Сенатига президент томонидан тақдимнома киритилганди. Юқори палата уни лавозимдан олиш тўғрисида қарор қабул қилди.
