Тошкент вилоятида 9 нафар экология масъули лавозимидан олинди
Чирчиқ дарёсида ноқонуний қум-шағал қазиш ва муҳофаза ҳудудларига чиқинди ташлаш ҳолатларига қарши назорат сустлиги танқид қилинди.
Тошкент вилоятида экологик назорат соҳасида йўл қўйилган камчиликлар танқид қилиниб, қатор масъулларга нисбатан интизомий чоралар қўлланилди.
Экология ва иқлим ўзгариши миллий қўмитаси раиси, Экополиция бошлиғи Азиз Абдуҳакимов раислигида ўтказилган кенгайтирилган йиғилишда вилоятда атроф-муҳитни муҳофаза қилиш ва экологик назоратни ташкил этишдаги камчиликлар муҳокама қилинди.
Йиғилишда экологик назоратнинг суст олиб борилгани, айрим хўжалик юритувчи субъектлар фаолияти устидан етарли назорат ўрнатилмагани, экологик экспертиза хулосасисиз ҳамда дарё муҳофаза зоналарида рухсатсиз фаолият юритаётган объектларга нисбатан чоралар кўрилмагани қайд этилди.
Шунингдек, Чирчиқ дарёси ўзанида ноқонуний қум-шағал қазиб олиниши ва муҳофаза ҳудудларига чиқиндилар жойлаштирилиши ҳолатлари юзасидан назорат етарли даражада таъминланмагани таъкидланди.
Муҳокамалар якунида Тошкент вилояти Экополицияси бошлиғи ўринбосари ҳамда саккизта туман ва шаҳар бўлимлари бошлиқлари эгаллаб турган лавозимидан озод этилди.
Шу билан бирга, Тошкент вилояти Экология бош бошқармасига аниқланган камчиликларни бартараф этиш бўйича топшириқлар берилди. Қорақалпоғистон Республикаси, вилоятлар ва Тошкент шаҳар экология бошқармаларига ҳам ўз фаолиятини қайта таҳлил қилиш, назорат самарадорлигини ошириш ва экологик маданиятни юксалтириш юзасидан вазифалар юклатилди.
Қўмита маълумотига кўра, экологик назорат республиканинг бошқа ҳудудларида ҳам кучайтирилган бўлиб, масъулиятсизлик ҳолатларига нисбатан қатъий чоралар кўрилади.
