Трамп Си Цзиньпин ва Путиндан Эрон урушида бетараф қолгани учун миннатдор бўлди

АҚШ президенти Доналд Трамп Хитой раиси Си Цзиньпин ва Россия президенти Владимир Путин Эрон уруши давомида бетараф позицияни сақлаганини айтиб, уларга миннатдорчилик билдирди. Бу ҳақда Reuters хабар берди.

 

Трампнинг сўзларига кўра, Пекин ва Москва вазиятни мураккаблаштириш имкониятига эга бўлса-да, бундай йўл тутмаган.

 

Трамп бу ҳақда Франциянинг Эвиан-ле-Бен шаҳрида ўтказилган G7 саммити якунлари бўйича матбуот анжуманида маълум қилди. У Эрон можароси бўйича эришилган ўт очишни тўхтатиш келишувидан сўнг Хитой ва Россия раҳбарларининг ҳаракатларини ижобий баҳолади.

 

АҚШ президенти Си Цзиньпин можарони ҳал этишга кўмаклашганини таъкидлаб, Хитой Эронга йирик қурол-яроғлар ёки елкадан учириладиган зенит-ракета мажмуаларини юбормаганини қайд этди. Трампнинг фикрича, Пекин ва Москва можарога фаол аралашганида вазият янада кескинлашиши мумкин эди.

 

Шу билан бирга, Трамп АҚШнинг айрим иттифоқчиларини, жумладан Япония ва Европадаги ҳамкорларини ҳарбий операция ҳамда Ҳормуз бўғозидаги ҳаракатларда етарлича ёрдам бермаганлик учун танқид қилди.

 

Қайд этилишича, Россия ва Хитой Эрон билан яқин алоқаларга эга. Москва аввалроқ уруш Яқин Шарқда ядровий қуролланиш пойгасига туртки бериши мумкинлиги ҳақида огоҳлантирган. Пекин эса АҚШнинг Эронга қарши ҳужумларини мамлакат суверенитетининг бузилиши сифатида баҳолаган.

 

Вашингтондаги Хитой элчихонаси Трампнинг баёнотига муносабат билдирар экан, Пекиннинг позицияси ўзгармаганини ва Хитой можарони дипломатик йўл билан ҳал этиш ҳамда тинчликни таъминлаш тарафдори эканини маълум қилди. Россия элчихонаси эса Reuters сўровига дарҳол изоҳ бермаган.