Андижонда қарийб 2,5 килограмм “гашиш” мусодара қилинди
Мазкур гиёҳвандлик воситалари мамлакат ҳудудига хориждан контрабанда йўли билан олиб кирилган.
Давлат хавфсизлик хизмати, Ички ишлар ва Божхона органлари ходимлари ҳамкорлигида Андижон вилоятида ўтказилган тезкор тадбирлар давомида қарийб 2,5 килограмм «гашиш» моддаси мусодара қилиндиБу ҳақда ДХХ Zamon.uz'гa маълум қилди.
Маълум қилинишича, Асака туманида ўтказилган тезкор тадбирда «Lasetti» русумли автомобиль тўхтатилиб, кўздан кечирилган. Текширув давомида Наманган ва Марғилон шаҳарларида яшовчи 1970, 1981 ва 1984 йилларда туғилган уч нафар фуқарога тегишли бўлган 2 килограмм «гашиш» моддаси аниқланиб, процессуал тартибда расмийлаштирилган.
Шунингдек, Марҳамат туманида ўтказилган яна бир тезкор тадбирда Қува шаҳрида яшовчи, 1985 йилда туғилган фуқаро бошқарувидаги «Cobalt» русумли автомашина кўздан кечирилганда, ундан 497 грамм «гашиш» моддаси ашёвий далил сифатида олинган.
Қайд этилишича, мазкур турдаги гиёҳвандлик воситалари мамлакат ҳудудига хориждан контрабанда йўли билан олиб кирилган.
Ҳозирда ҳар икки ҳолат юзасидан гумонланувчиларга нисбатан жиноят ишлари қўзғатилиб, уларга нисбатан «қамоқ» эҳтиёт чораси қўлланган. Тергов ҳаракатлари давом эттирилмоқда.
