Қозоғистонда бир хонали квартирада қарийб 1000 мигрант рўйхатга олинган
Мазкур ҳолат ноқонуний миграцияни ташкил этиш сифатида баҳоланиб, квартира эгаси озодликни чеклаш жазосига ҳукм қилинган.
Қозоғистоннинг Олмаота шаҳрида бир хонали квартирада қарийб минг нафар шахс ноқонуний равишда рўйхатга қўйилгани фош этилди. Бу ҳақда шаҳар прокуратураси маълумотига таяниб, Zakon.kz нашри хабар берди.
Маълум қилинишича, ҳолат Олмаотанинг Науризбай туманида прокуратура томонидан ўтказилган текширув давомида аниқланган. Аниқланишича, квартира эгаси аслида ушбу манзилда яшамайдиган 990 нафар фуқарони пул эвазига бир хонали уйда рўйхатдан ўтказган.
Мазкур ҳаракат ноқонуний миграцияни ташкил этиш сифатида баҳоланиб, унга нисбатан Қозоғистон Жиноят кодексининг 394-моддаси бўйича жиноят иши қўзғатилган.
Суд қарори билан квартира эгаси айбдор деб топилиб, бир йил муддатга озодликни чеклаш жазосига ҳукм қилинди.
Прокуратура маълумотларига кўра, ноқонуний рўйхатдан ўтказилган шахсларнинг қайси давлат фуқаролари экани очиқланмаган.
